ဝၢႆးသေၸဝ်ႈမႁေႃႇ ၵႄႈပျတ်ႈသၼႃႇၸိူၵ်ႈသၢႆးယဝ်ႉ၊ ထိုင်မႃးဝၼ်း႞ ၶုၼ်ႁေႃၶမ်း ဝိတေႇႁရၢတ်ႈ သမ်ႉပူင်ၵႂၢမ်းၼၵ်းတီႈၵူၼ်းဝၢၼ်ႈ ၸဝ်ႈမႁေႃႇယူႇၼၼ်ႉဝႃႈ ႁႂ်ႈၶဝ်ဢဝ်ၼွင်လူင်လုၵ်ႈ႞ ဢၼ်မီးမူဝ်ႁႃႈပိူင်ပေႃးတဵမ်ဝႆႉၼၼ်ႉ ၵႂႃႇၼွပ်ႇၸဝ်ႈႁေႃၶမ်း၊ ပေႃးဢမ်ႇဢဝ်မႃးၼွပ်ႇလႆႈၸိုင် တေမႂ်ငိုၼ်းႁဵင်႞ ဝႃႈၼင်ႇၼႆ။ ၵူၼ်းဝၢၼ်ႈတင်းလၢႆဢမ်ႇၸၢင်ႈႁဵတ်းႁိုဝ်၊ ၸင်ႇၵႂႃႇၸူးၸဝ်ႈမႁေႃႇယဝ်ႉ။
ၸဝ်ႈမႁေႃႈၵေႃႈႁူႉဝႃႈ ထုၵ်ႇလႆႈၵႄႈတွပ်ႇၶိုၼ်း ၵႂၢမ်းၼၵ်းၼၼ်ႉလႄႈ လၢတ်ႈတီႈၵူၼ်းဝၢၼ်ႈဝႃႈ
ယႃႇႁႂ်ႈလႆႈမႆႈၸႂ်၊ ၵူၺ်းၵႃႈ ႁႃပၼ်ၵူၼ်းႁတ်းၵူၼ်းႁၢၼ် လၵ်ႈလႅမ် မေႃလၢတ်ႈ မေႃၸႃ သၢမ်သီၵေႃႉ
ဝႃႈၼႆ။ ၵူၼ်းဝၢၼ်ႈၵေႃႈႁႃပၼ် ၼင်ႇၵႃႈၵၢင်ၸႂ် ၸဝ်ႈမႁေႃႇမီးၼၼ်ႉယဝ်ႉ။
ယၢမ်းၼၼ် ၸဝ်ႈမႁေႃႇၸင်ႇၸႂ်ႉၶဝ်ၵႂႃႇလဵၼ်ႈၼမ်ႉ ႁႂ်ႈတႃပေႃးလႅင်ဝႅၼ်းဝႅၼ်း၊ လဵၼ်ႈၼမ်ႉယဝ်ႉၸင်ႇၼုင်ႈၶူဝ်းဢၼ်ၼုၵ်းၵူမ်ႇၼုၵ်းဢုင်၊
ယိပ်းၸိူၵ်ႈယိပ်းၶွၼ်ႉယိပ်းမႆႉ၊ ၵမ်ႈၽွင်ႈယိပ်းၵွၼ်ႈလိၼ် မၢၵ်ႇႁိၼ်သေမိူဝ်းၸူးၽၵ်းတူႁေႃ
ၼႃႈဝၼ်းဢွၵ်ႇ ယွၼ်းၶႂၢင်းၶဝ်းၸူး ၶုၼ်ႁေႃၶမ်းသေလႄႈ လၢတ်ႈဝႃႈ“ၼေႃးတီႈၶႃႈ-
ၶႃႈၸဝ်ႈၶဝ်ၵႂႃႇႁႃၼွင်လူင် ဢၼ်မီးမွၵ်ႇတဵမ်ဝႆႉၼၼ်ႉ၊ ၵႂႃႇထူပ်းႁၼ်ၼွင်လူင်လုၵ်ႈ႞
တီႈၼႂ်းထိူၼ်ႇၶႃႈၼေႃႈ၊ ၵူၺ်းၵႃႈမၼ်းႁႄၼႃႇ၊ ၶႃႈၸဝ်ႈၶဝ်ၸင်ႇတဵၵ်းမတ်ႉသေၸုင်မႃး၊ သမ်ႉမႃးႁၼ်ၶူးဝဵင်းလူင်
ၸဝ်ႈႁဝ်းလိူမ်ႈလိူမ်ႈလႆႇလႆႇဝႆႉ မၼ်းၵူဝ်ၼႃႇ ဢမ်ႇႁတ်းမႃး၊ တဵၼ်ႈတဵၼ်ႈဝႅၼ်ဝႅၼ်၊ ဢဝ်ၸိူၵ်ႈၶၢတ်ႇၵႂႃႇလႄႈ
လမ်းတီႉၵေႃႈဢမ်ႇလႆႈ၊ ၸဝ်ႈႁဝ်းမုၼ်ႁူမ်ႇၸႂ်ႉၵူၼ်းမတ်ႉဢဝ် ၼွင်ငႄႈဢွၼ်ႇလုၵ်ႈ႞ ၵႂႃႇပၢႆးဢဝ်သေၵမ်းတီႈၶႃႈ”။
ၶုၼ်ႁေႃၶမ်းၵေႃႈ ပေႃးလႆႈငိၼ်းၵႂၢမ်းၼင်ႇၼႆ ၸင်ႇပူင်ၵႂၢမ်းဝႃႈ “ၼွင်ငႄႈၼွင်ႁႄဢၼ်ဝႃႈၼႆႉ ၵဝ်ဢမ်ႇတွၼ်ႉႁၼ်တွၼ်ႉငိၼ်း မီးၵေႃႈဢမ်ႇမီး”
ၵမ်းၼၼ်ႉ ၶဝ်ၸင်ႇတၢင်ႇလဝ်ႈဝႃႈ“ၸဝ်ႈယႂ်ႇၶုၼ်လူင်
ၽုင်းၵၢမ်ႇယႂ်ႇတီႈၶႃႈၼေႃႈ ပေႃးဝႃႈၸဝ်ႈႁဝ်းဢမ်ႇပၼ်ၼွင်ငႄႈလႆႈၵေႃႈ ၶႃႈၸဝ်ႈႁဝ်းၶဝ် တေဢမ်ႇၸၢင်ႈဢဝ်ၼွင်လူင်ၼၼ်ႉ
မႃးသၢၵ်ႈၸဝ်ႈႁဝ်းလႆႈတီႈၶႃႈၼေႃႈ”။
------------
ငဝ်ႈတိုၼ်း
ပပ်ႉႁဵၼ်းလိၵ်ႈတႆးၸၼ်ႉသၢမ်
ၶွမ်ႇမတီႇၶိုင်ပွင်ဢွၵ်ႇပပ်ႉႁဵၼ်းလိၵ်ႈတႆး
ၶရိတ်ႉ 1962 ၼီႈ
လိူၼ်မေႇ
No comments:
ပၼ်တၢင်းႁၼ်ထိုင် ...